एमसीसीविरुद्ध पेस भएको रिट सर्वोच्चद्वारा दरपीठ

एमसीसी सम्झौता लागू नगर्न भन्दै उत्प्रेषण र परमादेश मागसहित पेस भएको रिट सर्वोच्च अदालतले दरपीठ गरिदिएको छ । वरिष्ठ अधिवक्ता सुरेन्द्र भण्डारीले सोमबार सर्वोच्चमा उक्त रिट पेस गरेका थिए ।

सर्वोच्च अदालतले संसद्‌मा टेबल भइसकेको र संसद्‌मै विचाराधीन विषय भएकाले त्यसलाई दरपीठ गरेको सर्वोच्च अदालतका सूचना अधिकारी देवेन्द्र ढकालले जानकारी दिए । ‘यसअघि पनि एमसीसीविरुद्ध भद्रप्रसाद नेपालको निवेदन आएको थियो । ७६ फागुन ७ मा एकल इजलासबाट उक्त विषय संसद्को विचाराधीन विषय भएकाले त्यसलाई इजलासले सदर गरिदिएको थियो । सोही आदेशमा टेकेर सुरेन्द्र भण्डारीबाट पेस भएको निवेदन पनि सदर गरियो,’ उनले भने ।

‘दरपीठ’ भन्नाले कानुन बमोजिम दर्ता गर्न नसकिने लिखतमा सम्बन्धित अधिकृतले दर्ता गर्न नसकिनाको आधार र कारण खुलाइ आफ्नो हस्ताक्षर गरी सोही लिखतको पीठ, अन्य कुनै भाग वा छुट्टै कागजमा गरेको आदेशलाई बुझिन्छ ।