जनता अभियान आइतबार, चैत्र २०, २०७८
बलात्कार प्रयासको आरोप लागेपछि निलम्बनमा परेका नेपाल प्रहरीका एक जवान विराटनगरमा झुन्डिएको अवस्थामा भेटिएका छन् । एक महिलामाथि बलात्कारको प्रयास गरेको आरोप लागेका विराटनगर महानगरपालिका–५ घर भएका प्रहरी जवान २६ वर्षीय जितविक्रम दाहाल आइतबार बिहान मृत भेटिएका हुन् ।
जिल्ला प्रहरी कार्यालय मोरङका प्रवक्ता डिएसपी दीपक श्रेष्ठका अनुसार घरअगाडि रहेको भोगटेको रुखमा गाम्छाको पासो लगाएर झुन्डिएको अवस्थामा दाहाललाई मृत फेला पारिएको हो । आज बिहान रुखमा झुन्डिएको अवस्थामा उनलाई फेला पारेपछि आफन्तले प्रहरीलाई खबर गरेका थिए ।
दाहाल सुनसरीको शुक्रबारे प्रहरी चौकीमा कार्यरत थिए । महिलामाथि बलात्कारको प्रयास गरेको आरोपमा उनीविरुद्ध सुनसरी प्रहरीले जबरजस्ती करणी उद्योगको मुद्दा चलाएको थियो । अदालतबाट धरौटीमा छुटेपछि उनी विराटनगरस्थित घरमा बस्दै आएका थिए ।
पछिल्लो समय उनले डिप्रेसनको औषधि सेवन गर्दै आएको पारिवारिक स्रोतले बताएको छ । गत पुसदेखि निलम्बनमा परेका उनी मुद्दा विचाराधीन रहेकै अवस्थामा मृत भेटिएका हुन् । शवको कोसी अस्पतालमा पोस्टमार्टम गरिएको छ । घटनाका बारेमा थप अनुसन्धान अघि बढाइएको जानकारी डिएसपी श्रेष्ठले दिए ।
यहाँ कमेन्ट गर्नुहोस्