जनता अभियान बिहिबार, माघ १९, २०७९
इंग्लिस क्लब म्यानचेस्टर युनाइटेड काराबाओ कप फुटबलको फाइनलमा प्रवेश गरेको छ।
बुधबार राति भएको सेमिफाइनलको दोस्रो लेगमा नटम फरेस्टमाथि २-० र समग्रमा ५-० को जितसहित युनाइटेड उपाधि नजिक पुगेको हो।
घरेलु मैदान ओल्ड ट्राफोर्डमा युनाइटेडलाई जिताउन एन्थोनी मार्सियल र फ्रेडले एक-एक गोल गरे।
पहिलो हाफ गोलरहित बराबरीमा सकिएको खेलको ७३औं मिनेटमा मार्सियलले गोल गर्दै युनाइटेडलाई सुरुआती अग्रता दिलाएका थिए।
७६औं मिनेटमा फ्रेडले गोल गरेपछि युनाइटेड २-० गोलले विजयी भएको हो। यसअघि पहिलो लेगको खेलमा युनाइटेडले ३-० गोलको जित निकालेको थियो।
अब, उपाधिका लागि युनाइटेडले न्युकासलको सामना गर्ने छ। न्युकासल साउथह्याम्पटनलाई समग्रमा ३-१ ले हराउँदै उपाधि नजिक पुगेको हो।
फाइनल खेल २६ फेब्रुअरीमा लन्डनस्थित वेम्ब्ली स्टेडियममा हुने छ।
यहाँ कमेन्ट गर्नुहोस्